DISCIPLINE

Zomite I hong pun dungzui in laisiam le I pung hul hul ta uhi. Pilna leng hong khang hiai hiai a ngaihdan leng a hong tam mah mah ta hi. Tawndan leh gamtatdan a thak thak I hon mu ua hoih leng a hoih thei mah hi. Theology, secular leh a dang dang I khang mah mah ta uhi. Kum hong paizel ding ah tuh lamet huai leh I gam in a poimoh mah mah mipil leh misaim I tasam ding cih chuh gen ngailou a chiang sa ahi.

Ahi a I hong pil a I hong zil tam deuh deuh chiang in mite pilna in innsung, khotang etc ah I hong apply som chiat ta uhi, huai I va sin leh I va zil te a vek in a hoih kim hiam? I society ah apply theih hiam chih en masa phot leng deihhuai kasa mah hi. I gam leh minam in I taksam mah khat a ka theih tuh DISCIPLINE ahi in ka mu, nong bang hi in na na koih a le?

I gamsung I et vel chiang in Innsung a nuamsa leh khosathei mah I sak te le I innsung thu tak tak uh I vamuh chiang in tukum ban kum 30 leh 40 khong chiang in bang suak ding hiam chih chiang mah mah hi. Huai omdan tuh DISCIPLINE innsung ah omlou, Nu-leh-Pate’n tate kep dingdan theilou, Taten lah Nu-leh-Pa zahtak dan theilou. Pasal in Zi-leh-Tate kep dingdan theilou, Zi in Pasal-leh-tate kep ding dan theilou in innsung I om veng vung mai ta uh. Nidang a I pu-leh-pate uh ana hihdan te I ngeingaih nonkei uh a bang kasa. Tekte zahtak ding chih pen I mangngilh ta ua, eima ut dan chiat in I gamta mai ta uh hiin kana mu hi.

I School nasan ah leng ki sinsak dan “Western Style” I chizen peuh ua, huaite ei society a apply theihvuallouh ahi hi. Amau (Western mite) huai dan a zat ua leh tuh ki thunnun zou ua, innsung leh khotang ah ana pumhoih khinta uhi, ei lak ah huai apply thei ding in a chin dek neng kei uhi.

Gandhian Rule I chi ua, School khong ah Chiang (STICK) zatlouh ding I chi ua, ahi a dik na chaing a om kha ding himahleh ke ngiah dan in tuh a poimoh dan a zat ding ahi chi dan ka hi. Naupang tuh I hilh dan dan hong zui ding a mansa ahi ua, huaiziak in chiang zatlouh top sang in hiai rule zui zole bang a chi de aw!!!

· Naupang a tung in thuhilh ding.

· Tai ding.

· Gawtna piak ding.

· A lawmte lak a zumtak a koih ding

Hiaiteng hon man kei tei tei leh

· Chiang zat ding.

Hiai teng ban ah I gawt (punish) na zial hoihtak a hilh ding.

Huaiziak in I Zo Ngeina Nu-leh-Pa zahtak te I hih mangngilh kei ni, I ngeina luite pen laisiam in bang siam leng le kebit ni, a hoih louhte bel paikhia in.

Zomi leh ZoSuan khantouh na ding in.

Hiai topic zang a YPA Bulletin, Central Lamka Branch dated 9^th September 2007 in a hon suh uh kipah huai kana sa mah mah hi. Himahleh ka lungsim honna kam gige khat in a hon behlap a hiai hunlemchang la in kenle ka ngaihdan leh ka lungtang honna kam gige khat ka hon kum tei ding.

Hunsawt kuam tak ina ngak uh, RADIO STATION hih I muhtheih in ei kiang ah a hong omta I mittang mah mah in leng a siiksang ding velvol tuh I mu chiat ding in ka gingta hi, muh leng a muhnop lotham hi, tu zet in tuh huntomchik sung program va zat zual chih omnon ding in I gingta kei, minute bangzah hima I neih ham ham khong hinonlou in ut dan dan a zat ziah ziah theih ding hong hilai ding hi, hiai I gen teng tuh tungnaitadihlou dang ahi.

Hiai a innpi ding om a bangdia zattheihloh lai lai tel ahi ding chih kidong le ei mah kihi zel hi, pau kilamdang ziak keleu a zat theihloh a om nilouh hitel hi. A chihleh hiai hich is koih koih leng bang hong piang ding hiam or a solution omkei nilouh leh tuh I maban ding uh gen sa ahi, "AKTA DUHGAWL KILOHKHUH".... I hih ding lauhuai mah mah hi.

I kiim a hiaibang deuh ana thuakkha te example lak poimoh petmah kasa hi.

• Burma Government in State hon hom lai un Kawlpi (Kalemyo) pen Sagaing Division chi in ana khek sak hiau uhi. Chin State sung ah omsaklou geih se uhi.

• Burma Government in University ding a hong bawl dek lai un Chin State a koih ding chi in thu ana pass uhi, himahleh pauleh ham gam leh nam, kou kahizo uh, kou khua, kou gam ah omhen chi in ana kituh nilouh ua, hun bangtan hiam nung in Government Kawlpi (Kalemyo) ah koih geh lel hi, Chin State KAHASE.

Hiai example 2 tegel et mai inle I maban ding theih hoih mah mah hi. Kum hong pai zel ding a, hichi banga Pau mumallou a I LINK LANGUAGE ding I gelkhom zok kei ualeh tuh I maban ding tuh MEITEI zat hong himai ding ahi, a station nasan le hong suansak ding uh lau huai ahi.

ZOMI – CHIN RADIO SERVICE

Phillippines a Quezon City apan Radio Verital Asia tungtawn in Zomi-Chin Radio Service kichi program zingkar dak 7:00 apan 7:27 kikar ngaihkhiat theih ding in om gige hi. Hiai program pen shortwave meter band 10 MB, MegaHertz 15.520 ah ngaihkhiat theih ding a, Paite-Tedim, Zou Thadou-Kuki, Gangte leh Vaiphei paute zang in Pathian thu leh la, Development Society, Politics, Drama, Interview program te khahkhiak hizel hi. Federation of Asia Bishop Conference te inntekna a kibawlkhia hi a, tulle in Father Mark Thangkhanai pen Program Co-ordinator in pang in Link Language ding in Zou pau kizang lel hi. A Lehlam ah, Tuibuang AIR Station a Link Language toh kisai hihfel kin deihthu mi tamtak in a gen ban uah, a baihthei pen a commissioning bawl a zatpah ahihtheih na ding in “Give & Take Policy” zatmai deihthu leng gen uhi. Hiai Give & Take Policy dan in tuh Tuibuang AIR Station program kizat ding sung teng a kimkhat Kuki Group ai-oh in Thadou-Kuki pau Link Language ding in zat hi henla, Zomi Group apan Paite pau zat hibok leh chih ahi. Radio Prime time dakkar 10 zat ahih leh dakkar 5 zel in Paite leh Thadou-Kuki paute Link Language ding in zat hileh fel baih pen dia lamen tam mah mah hi.

courtesy: YPA Bulletin dated 9th september 2007