Saturday, May 10, 2008

i've got this message attachment

Lalruatfela Nu.. i've got this message in my mail attachment, i guess its really important so, i'm posting it outta here for you...

Judiciary kan separate titu ten an pawngsual leh si

Lalruatfela Nu

Dan leh hrai hriatna lama thiamna nei ve hawt lo chung pawha neitu rilru pua ka lo thlir ve thin, ‘Separation of Judiciary’ hi satah chhuak pek an sawi ai pawhin a chhe zawk. Kan sorkarin "Judiciary kan separate fel tawh e" an tih leh sorkar hmasate’n an Separate ve lo khan kori a tu chuang lo va. Dan leh hrai thiam mi ni lo mah ila. Dan hnuaiah lo chuan zalenna, intluktlanna, dikna leh chanvo kan tihte hi chan theih a ni lo tih erawh kan hre chiang a. Chuvangin tunhnaia Court room singsak tur leh Family court etc sawn kual vel turah hian, thuneitute hian an ngaihtuah chiang lo hlein ka hria a. Tu huatthu mah sawi ka tum lo va, sawi dik lo palh ka neih leh a dik zawk hriaten chanchinbu kaltlangin emaw, keimah mimal emaw min hrilh mai se ka lawm hle ang.

MNF UKIL LEH PARTY DANGTE UKIL: Dan hre mi (Advocate) te hi sorkar hnathawk an ni ve miau loh avangin eng political party pawh lo awnin zawm hial pawh ni se, an mimal zalenna a ni a. Tuman sawisel theih a ni lo. Ka thu dawnna hi a dik a nih chuan tunhnai deuh atang khan, Aizawl District Court-a Magistrate pakhat chuan Congress Ukil list a nei a, a dawhkanah langsar takin a dah an ti! He Magistrate hian Hnam Run rimnam leh kohhranah pawh duhsak bik a nei a, a duhsak zawngte chu langsar takin a duhsak hmiah hmiah mai an ti bawk a. In lama amah be rawntute hnenah pawh; "Chumi khami advocate chu ruai suh, Congress advocate a ni a, a tla tlum lo, inchak lo vang," a ti hmiah hmiah mai thin niin an sawi bawk a. Magistrate an sawi hi, ‘Ukil te hlawha buai em em thin kha a ni e’ an ti leh zel a. Ukil thenkhat chuan, "Magistrate ban sanin Law Practice ve mai se" an ti hial a ni. Ka thu hriat hi tak tak a nih chuan a rapthlak mang e aw! Tlumte thlir taka mit tla dawn dawna ka lo thlir thin; Separation of Judiciary chuan awmzia a nei lovin, Judiciary hlutna tem phak ngei tura ngaihte pawhin an pawngsual bawrh bawrh a ni ber a. Nge ni a awmzia a nei lutuk zawk?!

FAMILY COURT, MACT, etc. TREASURY SQUARE ATANGA NEW CAPITAL COMPLEX-A SAWN TUM CHUNGCHANG HI LE: Sorkar khawhawi zim lutuk vangin kan High Court Bench chuan Aizawl khaw hmawr femah pawh a kilkhawr ber changing Luangmual Veng tawpah a awm mek a. Chutihlaiin, District Consumer Forum/ State Commission chu Tuikhuahtlangah dah a ni bawk a. Dan leh hrai lama harsatna nei (Litigants) te tan dawr a harsa em em a ni. Aizawl khawpuiah hian High Court awmna hre lo tam tak an awm phah reng a ni. State dangah chuan hmun laili ber (Heart of the City)-ah dahin a lailum a chang ngei ngei thin. Hetianga Court pawimawh pan hreawm leh hmun hla leh inkarkik deuh deuha a awm vang hian, a dawrtu mipui tan harsatna namen lo a thleng mek e tih tawh naka laiin, tunah hian Sub District Council Court leh MACT te chu New Capital Complex-ah sawn turin order tihchhuah leh a ni a. Heng Court dawrtute hi mirethei leh chhumchhiate te te kan ni a. New Capital pan nan City Bus a awm lo va, Taxi chuan man nei lo tan chuan tihngaihna a awm lo ni. Hetiang a nih meklai hian Judiciary pawngsualtute laka min chhan tura kan beisei, Mizo Bar Association te pawh hi khawnge an awm zawh tak le???

COURT ROOM LEH CHAMBER NEIH KAWP CHUNGCHANG: Titi lengvak mai mai nge ka hre law…tunah hian kan MJS Offcer te hian Office Chamber leh Court Room a hranga theuha nei turin hma an la niawmin ka lo hria a. India ram State hausa leh changkang ber berah chuan Court Room leh Office Chamber hrang nei an awm mahna?! Keini ram rethei leh hnuaihnung, kan Bed Room leh thenawmte Vawk In insi renga sak ngai khawpa hmun chepa chengte tan hi chuan a harsa deuh law maw?! Ka hriat chian ve deuh; Assam State-ah khuan Common Court Room an hmang mai a nih khu maw le! A reng reng thuah Court Room leh Office Chamber neih kawp chu eng a tan nge an tih ang aw?! An Court chhung khan an Office Chamber a ruak reng mai dawn a, engtiklai pawhin an Court reng awm si lo va. Room inchan lo viau e ti lovin Room ruak a awm heu huau reng mawi dawn a nih hmel a. Engpawhnise, Court Room leh Office Chamber neihkawp kha ropui riauin an hria emaw, ropui ta sawta an inhriat vang a nia nge?!

SECRTARIAT-AH SENIOR CIVIL JUDGE A THU EM? Tunah hian Law and Judicial Deparment-a Under Secretary hna chelhlai pakhat chu Senior Civil Judge Power pein Under Secretary leh Court hna a kawp mek a. Thubuai neite pawh Secretariat lamah an tlan thla thin an ti! Rapthlakin! Hetiang hi thil vang tak a ni.
A dika dawk hre ve lo mah ila, mipui aw leh thil chik mite ka tanga ngaihdan leh hmuhdan siam ve thei kan ni a. Hetianga hna pahnih inang lo em em chelh kawp theih a nih rau rau chuan, duhthu han sam ila…Kan Magistrate tha tak tak, mipui pawhin sawiselna kan hriat loh; Rorelna Dik hmanga Court zahawmna vawnghim thintute, Pi Marli Vankung MJS, Pu Saingura Sailo MJS, Pu P. Singthanga MJS te leh midang dangte pawh khu an nihna bakah Court Power pe ve leh se, Court indaih lo tih vel vanga Pawngsual Case Pending tam lutuka mipui thlaphanna te pawh a a kiang duak ang chu!! Kan Sorkar, Judiciary pawngsual nawn awn awntute hian District Court leh Secrtariat an pawlh a ni ta ber a. Hei hi em ni Separation of Judiciary an tih ve chu???!!!

UKIL LEH MAGISTRATE DANGLAMNA: Mipui mimir chauh hian emaw Ukil leh Magistrate hre hrang lo ka lo ti thina a lo ni hauh lo nia! Sorkar Officer leh Magistrate te hial zingah pawh hre hrang mang lo an awm thin a, hei hian Dan Rorelna (Rule of Law) kan ngaihthahzia a tihlan chian em avangin a tlangkawm na ka’n hmag duh a ni.
Magistrate chu Sorkar hnathawk an ni a, an dam loh nikhuain In an awm pawhin chawlh an la thei a. Medical Rimbursement an Bill thei bawk a. Zankhat mitchhin an tawh palh pawhin an nupui pasal, an fanuate pawhin Pension leh Service Benefit an nei vek a ni. Sorkar atanga hlawh an lak bak khawi atang mahin chengkhat lek pawh an dawng thiang lo. An dawng a nih chuan THAMNA emaw EIRUK emaw a ni mai!
Chutihlaiin Ukil te chu Sorkar hnathawk an nih ve loh miau avangin Medical Reimbursement a awm ve lo va. Chawlh an nei na hek lo. Zankhat mitchhin pawh lo tawk se, an nupui pasal, an fanaute tan lukhawng a awm lo. Anmahni ruaitute pawisa pek hi an hlawh a ni mai. An vanneih dan a zirin Income chu thlakhatah Rs. 1/- atang Cheng maktaduai tel a ni thei. Magistrtate te erawh chu Sorkar hnathawk an nih avangin an Pay Scale a zir a ni mai. Hausak thut theih a ni lo. ‘Ukil te Income chiah hi Khawvel thuruk awm chhun a ni e’ an ti lo ti mathlawn lo va…
Engpawhnise, tuna Judiciary kalphung hi chu satah chhuak pek aia lungchhiatthlak zawk a ni a. Kan sorkar tawihnawk tak hian, pawngsuala sawisa lo hian an dah hrang ngam lo a nih chuan " Sorkar dang tihngam loh kan ti" tia an iak thlawnte kha zahna chang hria se la. " Dan Rorelna (Rule of Law) kan ngaisang thiam lo va, Ramhnuai Dan bak hriat pawh kan nei lo va. Chuvanga tlawmngai pawl (YMA) tel lova kan sorkar hi kal thei lo ti kan reng a…" ti law law se la. Chutia an tih law law chuan Dan Rorelna ngaihsan vanga Judiciary then hran duhtute chuan ‘E a ni tak e maw! Ram hnuaiah an awm rei em a. Dan Rorelna awmzia an la hre rih lo a nih hi’ kan ti mai ang.

Zobawm

0 comments: